Qara Qarayevin təxminən 1,5 aylıq klubsuz günləri başa çatdı.

Milli komandamızın sabiq üzvü mövsümün qalan bölümünü "Araz Naxçıvan"da keçirəcək.

Qara hazırkı performansı ilə yaşıl meydanlarda top qovmağı haqq edirdi.

Sadəcə meydandan kənar söhbətlərin qurbanı olan yarımmüdafiəçinin karyerasındakı son iki mövsüm durğunlu dövrü kimi yadda qaldı.

Bəs bundan sonrası onun adına nə vəd edir?

İlk baxışdan təmsil olunduğu Naxçıvandan didərgin düşən, azarkeş dəstəyindən məhrum olan, bazası, meydançası olmayan bir kluba keçid xoş qarşılanmaya bilər.

Amma işin müsbət tərəfləri də yox deyil.

Qara ambisiyalı oyunçudur. Daim meydanda olmaq, komandasını kömək etmək istəyir.

"Neftçi" rəhbərliyinin həvəskar davranışı ucbatından mövsümün gedişində klubsuz qalan futbolçu üçün imkanlar geniş deyildi. Çünki klubların əksəriyyəti heyətini formalaşdırıb.

Belə şərtlər altından "Araz"dan gələn təklif göydəndüşmə sayılmalıdır. Özü də iki tərəf üçün.

Muxtar respublika təmsilçisi hazırda uğurlu dönəm yaşayır.

Arxada qalan 11 turda cəmi 1 dəfə məğlub olan kollektiv iddialılar sırasındadır.

Hədəf isə avrokuboklara getməkdir. Şanslar da kifayət qədər yüksək.

Lakin kasad heyət və yerli oyunçu qıtlığı Elmar Baxşıyevin əl-qolunu bağlayan əsas maneədir.

Belədə 32 yaşlı futbolçu öz zəngin təcrübəsi ilə ona böyük fayda verə bilər.

Həm də özü qazanar.

Necə? Orta sahə oyunçusu uğurlu mövsüm keçirməklə komandasının avrokuboklara gedişinə yardımçı olacağı halda milli komandanın qapıları da onun üzünə açılacaq!

3 illik aradan sonra...

XANOĞLAN İMANOV