"Araz Naxçıvan"ın Premyer Liqada məğlubiyyətsiz seriyası davam edir.
Birinci turda "Qarabağ"a məğlub olan (1:4) Muxtar respublika təmsilçisini sonrakı 8 qarşılaşmada durduran yoxdur.
Bunda Felipe Santosun xüsusi əməyi var.
Braziliyalı legioner vurduğu 4 qol və etdiyi 1 məhsuldar ötürmə ilə komandasına böyük fayda verib.
Ələlxüsus da son 4 qarşılaşmada "sambaçı" qarşısılanmazdır.
5 oyun davam edən "qol orucu"nu Tovuzda pozan 27 yaşlı futbolçu 4 görüşdü qolları sıralayır.
Həm də hava-su kimi vacib.
Felipenin "Turan Tovuz" (2:1), "Səbail" (3:2) və "Şamaxı"nın (1:0) qapısından keçirdiyi qollar komandasına 3 xal qazandırıb.
Masazırda "Sabah"ı məyus etdiyi görüşdə isə (1:1) "Araz" məğlubiyyətdən xilas ola bilib.
Onun uğurlu çıxışı bombardirlər cədvəlinə də ciddi sirayət edib.
İndi hücumçunu siyahıya 6 qolla başçılıq edən Cesse Sekidikadan cəmi 2 qol ayırır.
4 görüşdü komandasını çiyinlərində daşıyan "97 nömərə"nin bundan sonra sabitliyi qoruması qalır.
XANOĞLAN/ SPORTİNFO.AZ