![“Yox-yox, Azərbaycanda qalmaq istəmirəm” – Premyer Liqada adından söz etdirən](https://www.sportinfo.az/media/2024/06/19/2701036656b39750bf2e.jpg)
Ötən mövsüm Premyer Liqada 9, Azərbaycan kubokunda vurduğu 4 qolla komandasının ən məhsuldar futbolçusu olan Orxan Əliyev karyerasını başqa klubda davam etdirəcək.
28 yaşlı hücumçu yeni iş yerini müəyyənləşdirməyib, hələ ki, axtarışlarını davam etdirir.
Səbəbkar Sportinfo.az-a verdiyi müsahibədə “Araz-Naxçıvan”dan ayrılmasından bəhs edib, Azərbaycanda oynamaq istəməməsinin səbəblərini deyib.
- Klubsuzsan. Nə yenilik var?
- Açığı, bu günə elə bir məlumat yoxdur. Bakıya yeni qayıtmışam, gözləyirəm, görək nə olacaq.
- Danışıq apardığın klublar var?
- 2-3 klub var, fərqli menecerlərin vasitəsi ilə onlarla təmasdayam. Ən yaxşı variantı seçməklə doğru qərar vermək istəyirəm.
- Azərbaycanda?
- Yox-yox, burada qalmaq istəmirəm.
- Niyə?
- Buradakı insanlarla işləmək çətindir. İşə və insanlara yanaşmaları, davranışları ürəyimcə deyil. Ona görə də ən yaxşısı başqa ölkədə oynamaqdır.
- “Araz-Naxçıvan”la həmin adamlara görə anlaşa bilmədin, yoxsa maliyyədə razılığa gəlmədiniz?
- “Araz-Naxçıvan”la sırf pul məsələsində razılaşmadıq.
- Bəlkə istədiyin pulu başqa Azərbaycan klubu verəcək, onda necə?
- Elə olsa, oturub danışa bilərik. Hələ ki, gözləyirəm.
- Deməli, problem insanların davranışında və işə yanaşmasında yox, istədiyin maaşı verməmələrindədir.
- Hər ikisi səbəbdir. Mən ümumi mənada dedim. Məni razı salmayacaq yerdə olmaq istəmirəm.
- Premyer Liqa klublarından danışıq apardıqların olub?
- Bəli, var idi. İlk söhbətdəcə imtina etdim. Dediyim kimi, şərtlər ürəyimcə deyil. Hazırda burada heç bir klubla danışıq aparmıram.
HƏBİB