“Qarabağ”ın Avropa Liqasındakı növbəti rəqibi “Lion”dur. Fransa nəhəngini ətraflı şəkildə tanıtmağa gərək yoxdur.
Təkcə bir faktı qeyd etmək lazımdır ki, təmsilçimizin Liqa mərhələsində üz-üzə gəldiyi rəqiblər arasında “Tottenhem”lə birlikdə ən imkanlı və nüfuzludur.
Ünlü “transfermarkt” saytı oyundan əvvəl ənənəsinə sadiq qalaraq klubların müqayisəsini təqdim edib.
Əsas komandadakı futbolçuların ümumi transfer dəyəri “Lion”da 240 milyon 300 min avro, “Qarabağ”da 20 milyon 230 min avro təşkil edir. Arada 12 qat fərq var.
“Lion”da ortalama yaş həddi 26.4, “Qarabağ”da bu göstərici 27.4-dür.
“Lion”dakı A milli komandalarında oynayanların sayı 11, “Qarabağ”da 13-dür.
“Lion”da gənclərdən ibarət millilərdə oynayanların sayı 9, “Qarabağ”da 5-dir.
“Lion”da legionerlərin sayı 18, “Qarabağ”dakı əcnəbilərin sayı 15-dir.
Göründüyü kimi, iki klubun arasında arada yerlə göy qədər fərq var. Əsas olan fərqin meydanda görünməməsidir ki, “Qarabağ”ın uğurlu nəticə ilə azarkeşləri sevindirəcəyinə ümid edək.
Bu gün Tofiq Bəhramov adına Respublika stadionunda keçiriləcək oyunun start fiti saat 21:45-də çalınacaq.
HƏBİB / SPORTİNFO.AZ
