Məlum olduğu kimi, AFFA İntizam Komitəsi II Liqada mübarizə aparan "Haypers Quba"nın prezidenti Ayaz Abdullayevi, məşqçisi Rəsul Babazadəni, futbolçuları Baxşəli Baxşəliyev və Xaqan Məmmədovu cəzalandırıb.

Qərarda qeyd edilib ki, liqanın 19-cu turunun “Ağdaş”la oyunu (3:3) bitdikdən sonra “Haypers Quba”nın prezidenti Ayaz Abdullayev hakimi təhqir etdiyinə görə 3 oyun şərti olmaqla, 5 oyunluq cəzalandırılıb.

Quba klubu 400 manat cərimələnib. Sınaq müddəti 3 ay təyin edilib.

Həmçinin eyni görüş başa çatdıqdan sonra “Haypers Quba”nın məşqçisi Rəsul Babazadə meydana daxil olaraq hakimi hədələyib. O, bu səbəbdən 2 oyun cəzalandırılıb. Klub isə 100 manat cərimə edilib.

Bundan əlavə, həmin oyunda "Haypers Quba"nın futbolçularından Baxşəli Baxşəliyev ciddi qayda pozuntusuna görə birbaşa qırmızı vərəqə aldığı üçün 2 oyunluq, Xaqan Məmmədov isə ikinci sarıdan qırmızı vərəqə aldığı üçün 1 matçlıq cəzalandırılıb.

Hadisənin videosu ilə artıq tanışıq. Kadrlardan görünür ki, final fitini verəndən az keçmiş yerli klubun nümayəndələri meydanın mərkəzində dayanmış hakimlər briqadasına yaxınlaşır.

Onlar referi Qamil İmanzadə və yardımçıları ilə bir qədər söhbət edir. Yanındakı şəxslərdən fərqli olaraq, Ayaz Abdullayev özünü sakit aparır.

Hərəkətlərinə əsasən deyə bilərik ki, "fit sahibləri"ni söydüyü qətiyyən hiss olunmur.

SPORTİNFO.AZ