"Dinamo"nun prezidenti Yaşar Seyidov Peşəkar Futbol Liqasına (PFL) müraciət edib.\

II Liqada mübarizə avparan klubun rəhbəri PFL-in prezidenti Elxan Səmədova ünvanladığı məktubda mühüm təklif səsləndirib.

O, aprel ayının 11-də keçiriləcək AFFA-nın növbəti Konfransında bir məsələnin gündəmə gətirilməsini istəyib.

Söhbət AFFA tərəfindən aşağı liqa təmsilçilərinə ayrılan yardım paketindən gedir. Belə ki, uzun illərdir ölkə futboluna xidmət edən təcrübəli funksioner həmin dotasiyanın məbləğinin artırılmasının zəruriliyini məktubda müxtəlif faktlarla əsaslandırıb.

Həmçinin I və II Liqa mənsublarının AFFA-nın hesabat Konfranslarında iştirakının təmin olunmasını vacib sayıb:

"II Liqanın yaradılması futbol ictimaiyyəti, azarkeşlər arasında böyük rezonans doğurub, ölkədə futbol coğrafiyasını genişləndirib.

"Dinamo" həvəslə çempionatda çıxış edir, aşağı liqalarda yeganə klubdur ki, maddi sıxıntılara baxmayaraq, 10 yaş qrupu üzrə uşaq yarışlarında tam tərkibdə çıxış edir.

AFFA İnkişaf Strategiyası artıq qəbul edilib. Strategiyanın müvafiq maddələrində I və II Liqa komandaları üçün şərait yaxşılaşdırıması xüsusi qeyd edilib.

Eyni zamanda, aşağı liqa komandalarının AFFA tədbirlərində aktiv iştirak etməsi, inteqrasiyası da nəzərə alınıb.

Bunu diqqətə alaraq, AFFA Konfransında II Liqa təmsilçilərinin təmsil olunması, ən azı hazırda ilk 6 pillədə qərarlaşan klubların iştirakı Azərbaycan futbolu adına ancaq müsbət hal olar.

AFFA Nizamnaməsinin 25-ci maddəsinin 3-cü bəndinə istinad edərək, Konfransın gündəliyinə II Liqa klublarına dotasiyanın artırılması məsələsinin salınmasını və bu təklifin AFFA Baş Katibliyinə qoşma məktubla göndərilməsini xahiş edirəm.

II Liqada komanda sayının və səfər xərclərinin çoxluğunu nəzərə alaraq, mövsümlük ayrılan 50.000 manat klubun xərclərini ödəmir.

10 yaş qrupunda "Dinamo"nun fəaliyyətini nəzərə alaraq, Premyer Liqa klublarına uşaq futbolu üçün ayrılan vəsait çərçivəsində köməklik göstərməyinizi, bunu AFFA rəhbərliyi səviyyəsinə çatdırmağınızı və əsaslandırnağınızı Sizdən xahiş edirəm.

AFFA Nizamnaməsinin müvafiq maddəsinə uyğun olaraq, PFL xətti ilə Konfransa 10 gün qalmışa kimi Baş Katibliyə rəsmi müraciət olunması rica edirəm".

SPORTİNFO.AZ