II Liqada doqquzuncu turun mərkəzi qarşılaşması «Şəfa» və «Hypers» arasında keçirilib.

Turnir cədvəlində ikinci-üçüncü pillələri bölüşdürən qonşuların matçını Rövşən Rəcəbov idarə edib.

Ötən tur Qubada «Şahdağ»a uduzmuş (1:3) Vüqar Nadirovun komandası Bakıya səfərdən də əliboş dönüb. Və yenə eyni hesab qeydə alınıb.

Qonaqlar ilk hissədə olduqca pis təsir bağışlayıb. Şimal təmsilçisi meydanın mərkəzini keçməyə çətinlik çəkib.

Top əsasən onların cərimə meydançası həndəvərində hərəkət edib. «Şəfa» fasiləyə qədər 4-5 real qol epizodunu qiymətləndirməyib.

Elvin Nəsibov və Elməddin Hüseynzadənin qaçırdığı fürsətlərə adamın inanmağı gəlmir. Yarım metr məsafədən topu qapının üstündən necə vurmaq olar axı?!

Hüseynzadə 29-cu dəqiqədə qapıçıyla təkbətək çıxaraq, aşırma zərbəylə hesabı açdı. Elməddinin fərqləndiyi epizodda ofsayd olduğu görünsə də, nədənsə yan xətt hakimi bayrağı qaldırmadı.

Fasilədən sonra «Hypers» nisbətən özünə gəlib. Hərəkətliyi bir qədər artıran qubalılar 64-cü dəqiqədə Cavid İmamverdiyevin güclü vuruşuyla status-kvonu bərpa edib.

Onların bundan artığına gücü çatmayıb. Bir qədər keçmiş Elvin Nəsibov müdafiənin arxasına ötürülmüş topu götürərək, Elxan Qasımovla duelə yollanıb və çətinlik də olsa, topu qapı xəttindən keçirib.

Hə, biz bu yerdə adıçəkilən hücumçunun oyundankənar vəziyyətdə olmasından danışa bilərik, ancaq bayrağın yenə yuxarı qalxmaması düşündürücüdür.

«Hypers» 90+ dəqiqələrdə ard-arda iki zərbə aldı. Öncə Qeyrət Əliyev ikinci sarı vərəqəni alaraq, meydanı tərk etdi. Ardınca Rauf Məhərrəmov matçda yekun nöqtəni qoydu.

SPORTİNFO.AZ

"Şəfa" - "Haypers Quba” 3:1
Qollar: Elməddin Hüseynzadə, 29; Elvin Nəsibov, 73; Rauf Məhərrəmov, 90+4 // Cavid İmamverdiyev, 64
Bakı. “ASK Arena”. 400 tamaşaçı
Baş hakim: Rövşən Rəcəbov
Baş hakimin köməkçiləri: Orxan İbişov, Gülnurə Əkbərzadə
Dördüncü hakim: Nazim Abdullayev
Hakim-inspektor: İmanxan Sultani
AFFA nümayəndəsi: Zümrüd Ağayeva
Sarı vərəqələr: Ceyhun Cavadov, 45+2 (qeyri-idman hərəkəti); Aqşin Paşayev, 70 (hakimin qərarına etiraz) // Elxan Qasımov, 29 (hakimin qərarına etiraz); Nicat Abbasov, 53 (hakimin qərarına etiraz); Hakan Həsənov, 68 (hakimin qərarına etiraz); Məqsum Qənbərli, 73 (hakimin qərarına etiraz); Qeyrət Əliyev, 74, 90+2 (qeyri-idman hərəkəti); İlqar Ələkbərov, oyundan sonra (hakimin qərarına etiraz)
Qırmızı vərəqə: Qeyrət Əliyev, 90+2
Artırılan vaxt: I hissədə - 2 dəq; II hissədə - 5 dəq.

“Şəfa”: 13. Əli Həsənli 25. Qərib İbrahimov (k) 21. Novruz Məmmədov 6. Ceyhun Cavadov (88. Aqşin Paşayev, 59) 28. Ülvi Quliyev (10. Rauf Məhərrəmov, 59) 17. Hüseyn Əliyev 32. Elməddin Hüseynzadə (97. Cavad Bağırov, 90) 7. Elvin Nəsibov 77. İbrahim Aslanlı 27. Gülalı Mehrəliyev 11. Nurlan Şabanov (23. Comərd Baxşəliyev, 66)
Ehtiyat oyunçular: 1. Vaqif Şirinbəyov 12. Rafiq Həsənov 22. Tural Nərimanov 9. Röyal Nəcəfov 70. Elgün Abbaslı 8. Elçin Rəhimli 99. Muhəmməd Məmmədli 18. Rəsul Əliyev
Baş məşqçi: Nadir Əliyev

“Hypers Guba”: 98. Elxan Qasımov 55. Qeyrət Əliyev 10. Cavid İmamverdiyev (k) 19. Nurlan Novruzov 14. İlqar Ələkbərov 11. Nicat Abbasov 13. Məqsum Qənbərli 7. Elşən Veysov (9. Ravil Yusifli, 57) 77. Nicat Oruclu (25. Baxşəli Baxşəliyev, 72) 99. Hakan Həsənov (6. Denis Edilov, 82) 57. Nihat Sarıyev (8. Hüseyn Mənəfli, 57)
Ehtiyat oyunçular: 35. Fərman Bayramov 17. Nail Təhməzli 44. Rəhim Cəfərov 49. Valeh Məmmədov
Baş məşqçi: Vüqar Nadirov