II Liqada üçüncü tura yekun vurulub.

Mövsümə yaxşı başlayan «Hypers» Qubada növbəti matçına çıxıb.

Debütant «Lerik»lə qüvvələrinə nisbətinə aydınlıq gətirib və böyük hesabla qalib gəlib. Cavid İmamverdiyev dubla imza ataraq, ümumi qollarının sayını 5-ə çatdırıb və bombardirlər yarışmasına qoşulub.

«Bakı»dan tanıdığımız Nurlan Novruzov da ilk oyununda adını iki dəfə tabloya yazdırıb.

6:0-ı görüb belə təsəvvür yarana bilər ki, oyun birqapıya gedib.

Düzdür, «Hypers» ilk dəqiqələrdən ərazi üstünlüyünü ələ alıb, irəli xətdə fəal təsir bağışlayıb, ancaq «Lerik»in də əl-qolunu yanına saldığını, müqavimətsiz təslim olduğunu deyə bilmərik.

Cənub təmsilçisi birinci hissədə, həmçinin fasilədən sonrakı ilk 10-15 dəqiqə ərzində fərqlənmək üçün bir neçə əla fürsət yaxalayıb.

Elvin Cahangirli və Fahil Dostiyevin qaçırdığı epizodları nəzərə almalıyıq. Ümumiyyətlə, ev sahiblərinin qapıçısı Elxan Qasımovun da bəzi anlarda komandasını qoldan xilas elədiyini söyləyək.

«Lerik» müdafiə zonasında fərdi səhvlərlə yadda qalmasaydı, hesab heç belə biabırçı həddə çatmayacaqdı. Hətta Novruzovun 63-cü dəqiqədə fərqləndiyi epizodda Valid Yusubzadənin səhvini gözardı etməməliyik.

Kapitanın ayağına dəyib qapıçı Hafiz Məmmədlini yanıldan topa qapı xəttinin üzərində yetişən Nurlan karyerasının ən asan qoluna imza atdı. Əsəbiləşən Valid isə başını qapı dirəyinə çırpmaqdan saxlaya bilmədi.

SPORTİNFO.AZ