Azərbaycan I Liqasında 2025/2026 mövsümünün formatı bəlli olub.
Bu barədə AFFA İcraiyyə Komitəsinin iclasında qərar çıxarılıb.
Belə ki, cari mövsüm I Liqada turnir cədvəlini sonuncu yerdə başa vuran klub II Liqaya düşəcək, II Liqadan isə ilk 3 yeri tutan komanda birbaşa I Liqaya yüksələcək.
I Liqada 9-cu yeri və II Liqada 4-cü yeri tutan komandalar arasında neytral meydanda bir oyundan ibarət pley-off matçı keçiriləcək.
Qalib komanda I Liqada mübarizə aparmaq hüququ qazanacaq.
Cari mövsümün sonunda I Liqadan Premyer Liqaya 3 komanda yüksələcəyindən, belə bir sistem tətbiq olunacaq.
Beləliklə, saytımızın 1 ay öncə bununla bağlı yaydığı daha bir informasiya rəsmi təsdiqini tapdı.
Yeni informasiya? Bəli, artıq o da var.
Redaksiyamıza daxil olan son məlumata görə, AFFA II Liqada yarışan iddialı klubların rəhbərləri ilə ayrı-ayrılıqda görüş keçirib.
Federasiyanın inzibati binasında təşkil olunan yığıncaqlarda onların I Liqa ilə bağlı planları dinlənib, bu çempionatda iştiraka maliyyə cəhətdən hazır olub-olmadıqları soruşulub, hesabat hazırlamaları istənilib. Həmçinin lisenziyalaşdırma tələbləri barədə məlumat verilib.
Bildirilib ki, yalnız AFFA-nın ayırdığı 300 min manatlıq yardım paketinə ümid bələməsinlər, sponsor tapmaq sarıdan işlərini möhkəm tutsunlar.
SPORTİNFO.AZ
.jpg)
.jpg)
