“Bilirəm, bizdən gözləntilər böyükdür.
Çempionat yeni başlayıb və düşünürəm ki, nəticələri yaxşılaşdıracağıq”.
Bu sözləri Sportinfo.az-a açıqlamasında “Baku Sportinq”in baş məşqçisi Elman Sultanov deyib.
Ötən mövsüm II Liqada çempionluğu bayram edərək I Liqaya yüksələn paytaxt təmsilçisi yayda ciddi dəyişikliklərə məruz qaldı.
Yerli və legioner futbolçulardan qurulan komandanın liqada qarşısıalınmaz olacağı gözlənilsə də, “Baku Sportinq” hələ ki, ümidləri doğrultmur.
4 oyunda 1 qələbə və 1 heç-heçə sayəsində 4 xal toplayan kollektiv 10 komanda arasında 6-cı pillədə qərarlaşıb.
Baş məşqçi buna görə narahat deyil, çünki qarşısına çempionluq hədəfi qoyulmayıb:
“Məqsədimiz mövsümü ilk “5-lik”də başa vurmaqdır. II Liqadan gəlmiş, demək olar sıfırdan yığılmış komandayıq.
Desəm ki bu il çempion olub, növbəti mövsüm Premyer Liqada oynayacağıq, bu, doğru olmaz.
Şəxsi fikrimi bilmək istəyirsinizsə, gücümüz “5-liy”ə oynamağa imkan verir. Mövsümü hansısa yüksək pillələrin birində başa vurmağımızın özü belə, “Baku Sportinq” adına yüksəliş sayılacaq.
Bizi qarşıda uzun marafon gözləyir. İnanıram ki, məqsədimizə çatacağıq”.
HƏBİB