"Qəbələ" "Reyncers"in yerində görmək istəməzdik…

Avropa Liqasının Əsas yolunun I təsnifat mərhələsində “Qəbələ” ilə qarşılaşacaq Lüksemburqun “Proqres” klubu qitəmiqyaslı turnirə ölkə çempionatının gümüş mükafatçısı kimi vəsiqə qazanıb.

 

Sportinfo.az xəbər verir ki, 2017/18 mövsümündə “Düdelanj”la çempionluq uğrunda mübarizə aparan Niederkorn təmsilçisi sona iki tur qalmış qızıl medal şansını itirib.

 

26 matçda 63 xal toplayan “Proqres” çempiondan 5 xal geri qalıbsa, 3-cü pilləni 16 xal qabaqlayıb. Bütün qüvvəsini çempionata səfərbər edən komanda kubokla 1/8 finalda vidalaşıb.

 

Paolo Amodionun baş məşqçisi olduğu “Proqres” qazandığı gümüş medalla son 36 ildə ən yaxşı nəticəsini göstərib. Belə ki, Niederkorn təmsilçisi 1981/82 mövsümündə sonuncu gümüş əldə etmişdi.

 

Əsası 1919-cu ildə qoyulan “Proqres”in 99 illik tarixində daha böyük uğurlar da var. Lakin niederkornluların bütün nailiyyətləri ötən əsrlə bağlıdır. 1952/53, 1977/78 və 1980/81 mövsümlərində Lüksemburq çempionu olan komanda 1932/33, 1944/45, 1976/77 və 1977/78 mövsümlərində kuboka yiyələnib.

 

“Proqres”in avrokuboklardakı debütü də 1977-ci ilə təsadüf edib. Lakin 6 il ərzində 5 dəfə qitə səhnəsinə çıxan komanda 10 oyundan 9-da uduzub. Hesabında 1 qol və 1 heç-heçə olan niederkornlular növbəti şansı 33 il gözləməli olub.

 

Uzun müddət Lüksemburqun aşağı liqalarında çıxış edən “Proqres” 2005/06 mövsümündə elitaya vəsiqə qazanıb. Avropa səhnəsinə dönüş isə 2015-ci ildə gerçəkləşib. Lakin yenə qola həsrət qalan lüksemburqluların gücü yalnız bir heç-heçəyə çatıb.

 

2017/18 mövsümü klub tarixinə ən uğurlusu kimi düşüb. “Proqres” Şotlandiyanın “Reyncers” klubunu məğlub edərək mərhələ adlayıb. Evdə 2 cavabsız qol vuran Niederkorn klubu səfərdəki 0:1 hesablı məğlubiyyətə baxmayaraq turu adlayıb. Kipr AEL-i ilə II təsnifat mərhələsində isə “Proqres” hər iki matçda məğlubiyyətə üzülüb – 0:1, 1:2.

 

Ümumilikdə, avrokuboklarda 16 oyun keçirən komanda 1 qələbə qazanıb, 2 heç-heçə edib və 13 dəfə uduzub. Rəqib qapılarına 4 qol vuran komanda 36 top buraxıb.

 

“Proqres” ev oyunlarını Niederkorndakı “Stad Jos Haupert” stadionunda keçirir. Bu arena 4830 tamaşaçı tutumuna malikdi (gabalafc.az).

Tarix: 21 İyun 09:12    Oxunub: 618    Müəllif: Sportinfo.az

Digər xəbərlər

Köşə yazarları

Xəbər xətti

19 İyul 2018
18 İyul 2018


















2013 - 2016 Sportinfo.az Sayt Mozilla Firefox, Opera və İnternet Explorer ilə də tam dəstəklənir. Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.