“Neftçi”nin kapitanı "Zirə"nin legionerini elə "iynə"lədi ki...

Sportinfo.az xəbər verir ki, “Neftçi”nin kapitanı Ruslan Abışov ölkə kubokunun 1/4 final mərhələsinin cavab oyununda “Zirə” üzərində 2:0 hesablı qələbədən sonra sualları cavablandırıb. .

 

- Birinci oyunda son dəqiqələrdə buraxdığımız qolla məğlub olmuşduq. “Zirə” bizim üçün münasib rəqib deyil. Hər zaman onlarla oyunlarda çətinlik çəkirik. Amma bu dəfə hər şey qaydasında getdi. İstəyimiz ilk hissədə 1 qol vurmaq idi. Amma elə oldu ki, ikisini vurduq. İkinci hissədə hesabı daha da artırmaq istəyirdik. Çünki hər zaman hər şey ola bilərdi. Əsas olan mərhələni keçmək idi. Bunu da bacardıq. Yaxşı istirahət edib, ikinci dövrəyə daha güclü hazırlaşmalıyıq.

 

Hər iki komanda meydanda aqressiv görünürdü. Bunun səbəbi nə idi?
- Neçə oyun idi, “Zirə”ni məğlub edə bilmirdik. Üzərimizdə böyük təzyiq var idi. Azarkeşlərimiz də bu qələbəni çoxdan gözləyirdi. Mənə elə gəlir ki, nəticə tam yerinə düşdü. Belə bir oyunda bu cür qələbədən sonra yəqin ki, bizdən razı qaldılar. Bundan sonra hər iki cəbhədə maksimum nəticə göstərməyə çalışacağıq.

 

Qələbəni elə çılğınlıqla qeyd etdiniz ki, sanki finalda qalib gəlmisiniz...
- “Zirə” üzərində qələbənin bizim üçün xüsusi əhəmiyyəti var idi. Bu komandaya qarşı tilsim var idi.  Söz vermişdik ki, bu tilsimi qıracağıq. Azarkeşlərimiz də sağ olsunlar, möhtəşəm idilər. Bizə böyük dəstək göstərdilər. Hər şey yaxşı sonluqla qurtardı.

 

Neçə vaxtdı azarkeşlərlə bu qədər yaxın deyildiniz. Deyəsən, yavaş-yavaş aradakı “buzlar əriyir”...
- Azarkeşlərimiz hər zaman bizim yanımızdadılar. Heç vaxt problemimiz olmayıb. Müəyyən vaxtlarda küskünlük olmuşdu. Bu da təbiidir. Artıq hər şey keçmişdə qalıb. Əsas məsələ qələbə və növbəti mərhələyə keçmək idi. Mənə elə gəlir ki, bundan sonra bizi daha da yaxşı dəstəkləyəcəklər. Biz də onların etimadını doğruldacağıq.

 

“Zirə”nin legioneri Milan Duriç deyib ki, “Neftçi”nin heyətində ən yaxşı futbolçu Fariz Yusifov idi...
- Məğlub komandanın futbolçusu hər zaman bu cür fikirlər səsləndirir. Bu, normaldır. Əsas olan nəticədir. Oyun artıq bitib, 2:0 hesabı ilə qalib gəlmişik. Duriç “Qəbələ” ilə oyunda yəqin ki, “Neftçi”yə azarkeşlik edəcək.

Tarix: 15 Dekabr 09:12    Oxunub: 282    Müəllif: Sportinfo.az

Digər xəbərlər

Köşə yazarları

Xəbər xətti

19 Yanvar 2018
18 Yanvar 2018


















2013 - 2016 Sportinfo.az Sayt Mozilla Firefox, Opera və İnternet Explorer ilə də tam dəstəklənir. Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.