Qurban Qurbanovdan əsəbi cavab: "Bilmirəm siz hansı turnirin Bakıda keçirilməsini istəyirsiniz?"

Sportinfo.az xəbər verir ki, bu gün Çempionlar Liqasının qrup mərhələsinin son turunda "Roma"nın qonağı olacaq "Qarabağ"ın baş məşqçisi Qurban Qurbanov sualları cavablandırıb.

 

- Son oyunumuzdu. Düşünürəm ki, nəticə baxımından turnirdən razı olmasaq da, böyük bir təcrübə topladıq. Sabahkı oyunda da ciddi mübarizə aparacağıq. Ola bilər ki, "Roma"nın şansı bu oyundan asılı olsun. Ancaq düşünürəm ki, oyunçularım özlərini yaxşı tərəfdən göstərməyə çalışacaqlar. Bu, onlar üçün böyük bir şans olacaq.

 

Çempionlar Liqasında 2 böyük italyan məşqçi - Antonio Konte və Eysebio Di Françesko ilə qarşılaşmaq imkanınız oldu. Onlardan hansını fərqləndirərdiniz?
- Hər ikisi haqda xoş sözlər söyləyə bilərəm. Ümumiyyətlə, italyan futbol məktəbi taktikaya çox üstünlük verir. Konte və Di Françesko fərqli taktikadan istifadə edirlər. Bu, futbol üçün tamam fərqli fəlsəfələrdi. Onları bir-birindən ayırmazdım. Ona görə də həm "Roma"ya, həm də "Çelsi"yə qarşı oynamaq bizim üçün çətin olub. "Roma"nın 2 oyunda "Çelsi"nin qapısından 6 top keçirməsi bu komandanın gücündən xəbər verir.

 

Yarış cədvəli baxımından formal xarakterli oyundu. "Qarabağ" sabah meydana nə üçün çıxacaq?
- Əvvəl də bu oyun haqda qeyd etmişdim. Bu, son böyük oyunumuzdu. Bizim üçün bu matç böyük təcrübə verəcək. Ona görə də düşünürəm ki, sabah daha yaxşı oyun nümayiş etdirməliyik. Böyük bir şansımız var ki, oyunda təzyiq altında çıxış etməyək. Çalışacağıq ki, sonadək mübarizə aparıb özümüzü ən yaxşı tərəfdən göstərək.

 

Böyük oyuna ciddi itkilərlə çıxacaqsınız. Müdafiə xəttindəki boşluqları doldurmaq üçün hansı imkanlardan istifadə edəcəksiniz?
- Belə bir oyunda 3 əsas müdafiəçimizin olmaması, təbii ki, böyük problemdi. Ancaq çempionatda rotasiya edərək çalışırıq ki, oyunçularımız təcrübə toplasın. Buna baxmayaraq, dəfələrlə qeyd etmişəm ki, sabah hansı oyunçumuzun meydanda olmasından asılı olmayaraq, onlar özlərini bu oyunda tam hazır hiss edəcəklər.

 

Necə düşünürsünüz, 2 xaldan daha çox qazanmaq mümkün idi?
- Real baxmalıyıq. Biz bu qrupa düşəndə hamı fikirləşirdi ki, xalımız olmayacaq. Ancaq "Çelsi"yə yenilgidən sonra futbolçular daha da uğurlu çıxış etməyə başladılar. Dəfələrlə qeyd etmişəm ki, bu qrupdan 1 xal qazanırıqsa, bu, uğurumuzdu. Belə "böyük beşlik" klublarının bizə gəlməsi böyük bir şeydi. "Qarabağ", eləcə də Azərbaycan futbolu böyük təcrübə qazandı. Azarkeşlərimiz canlı şəkildə böyük futbolçuları görmək imkanı əldə etdi. Bəlkə də bəzi oyunçularımız olsaydı, daha çox xal yığa bilərdik.

 

"Roma" ilə oyunda heç-heçə də başa çata bilərdi. Di Françesko demişdi ki, həmin oyundan sonra şanslarımız artdı. Həmin oyundan sonra sizin üçün nələr dəyişdi?
- Əlbəttə ki, bu komandanın gücünü daha yaxından tanıdıq. Düzdü, ilk oyunda məğlub olduq. İlk 20 dəqiqəni çıxmaqla, futbolçular inamlı çıxış etdi. Onlarda ilk 20 dəqiqədə istər-istəməz həyəcan vardı. Çünki ilk ev oyunumuz idi. İndi oyunçularımızın özünəəmin olmasını görürəm. Onlar artıq özlərini daha sərbəst hiss edirlər.

 

Millidə gələn ay üçün yoxlama oyunları və yığmada köməkçi məşqçilər müəyyənləşibmi?
- Açığı, burda milli haqda çox məlumat vermək istəmirəm. Qısaca onu deyə bilərəm ki, sparrinq rəqiblər üçün axtarışlar gedir. İndi tam ətraflı məlumat verə bilməyəcəyəm. Bu barədə sonra daha çox düşünmək lazımdı. Yalnız onu deyə bilərəm ki, bu yöndə iş gedir. Bu məsələyə az da olsa vaxt ayırmışam.

 

"Avroliqada qrupdan çıxmaq Çempionlar Liqasında mübarizə aparmaqdan yaxşıdı" kimi mülahizələr var. Sizin bu barədə fikirləriniz necədi?
- Bilmirəm siz hansı turnirin Bakıda keçirilməsini istəyirsiniz?! Ancaq ilk növbədə biz ölkə çempionatında qalib olmalıyıq. Bundan sonra ən maksimum əhəmiyyətli turnirdə çıxış etmək istəyirik. Ola bilsin ki, yenə Avroliqada eyni cür çıxış edək. Çünki ordakı komandalar da güclüdür Lakin biz həmişə çalışırıq ki, Çempionlar Liqasında mübarizə aparaq. Əgər maksimuma köklənməsək, yaxşı olmaz.

Tarix: 5 Dekabr 13:36    Oxunub: 651    Müəllif: Sportinfo.az

Digər xəbərlər

Köşə yazarları

Xəbər xətti

17 Dekabr 2017
16 Dekabr 2017


















2013 - 2016 Sportinfo.az Sayt Mozilla Firefox, Opera və İnternet Explorer ilə də tam dəstəklənir. Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.