"İspaniya ilə oyunun favoriti biz deyilik" - Millimizin hücumçusu

Futzal üzrə milli komandanın hücumçusu Tyaqo Teles Martinsin Azərbaycan Futzal Federasiyasının (AFF) rəsmi "facebook" səhifəsinə müsahibə verib. Sportinfo.az həmin müsahibəni təqdim edir:

 

Avropa çempionatının final mərhələsinin püşkü atıldı. Millimizin yer aldığı qrupu necə dəyərləndirirsən?

- Əlbəttə, çətin qrupa düşmüşük. İspaniya dəfələrlə dünya və Avropa çempionu olub, bu gün də ən güclü millilərdəndir. Fransanın hazırkı nəsil oyunçuları isə böyük işlər görür. Xorvatiya kimi favorit hesab edilən komandanı play-offda mübarizədən kənarlaşdırdılar. Bizim komanda da hazırlaşır. Hər gün məşqlər edirik, gündən-günə artırdığımızı düşünürəm.

 

Növbəti mərhələyə yüksəlmək baxımından yığmamızın şansını necə qiymətləndirirsiniz?

- İndidən bir söz demək çətindir. Hər şey meydanda aydınlaşacaq. Ancaq komanda yoldaşlarıma inanıram, onların nəyə qədər olduqlarını bilirəm. Xeyli vaxtdır bir komandada çıxış edirik, üstəlik, köhnə-yeni baş məşqçimiz Alesio çox güclü mütəxəssisdir. Rəqiblərə hörmətlə yanaşırıq. Təbii ki, bu gün İspaniya qrupun faviritidir, amma biz bütün rəqiblərimizə qarşı sona qədər mübarizə aparacağıq.

 

İlk mərhələdən mübarizəyə başlayan Fransa millisinə aşkar autsayder kimi yanaşmaq nə dərəcədə düzgündü?

- Qətiyyən bu cür düşünmək olmaz. Fransa yaxşı təşkilatlanmış komandadır və onların keçdiyi yola nəzər salmaq güclərinə bələd olmaq üçün kifayətdir. İldən-ilə daxili çempionatları güclənir. Nəticədə milli komandaları inkişaf edir. Ona görə də, heç bir rəqibə autsayder kimi yanaşmaq olmaz.

 

İspaniya ilə ötən il Kolumbiyada keçirilən dünya çempionatının qrup mərhələsində də qarşılaşmısınız. Bu dəfə həmin yenilginin revanşını almaq mümkün olacaqmı?

- Çempionatları bir-birinə qarışdırmaq olmaz. Hər bir oyunun, yarışın öz xarakteri, təyinatı var. Atmosfer fərqli olur. Revanşa gəldikdə, biz İspaniya ilə oyunun favoriti deyilik. Onların əzəmətli tarixi, titulları var. Ancaq şansımız da yox deyil və bunu reallaşdırmağa çalışacağıq.

 

Sloveniyadan medalla qayıdacağınıza inam varmı?

- İlk növbədə hər bir oyuna və rəqibə hörmətlə  yanaşmalıyıq. İlk işimiz qrup mərhələsindən 1/4 finala yüksəlməkdir. Bunu etdikdən sonra növbəti addımlar haqda düşünməli, düşündükcə də psixoloji olaraq buna hazırlaşmalıyıq.

Tarix: 30 Sentyabr 14:30    Oxunub: 108    Müəllif: Sportinfo.az

Digər xəbərlər

Köşə yazarları

Xəbər xətti

19 Oktyabr 2017
18 Oktyabr 2017


















2013 - 2016 Sportinfo.az Sayt Mozilla Firefox, Opera və İnternet Explorer ilə də tam dəstəklənir. Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.